Iran scientist thah nan Sattelite-controlled gun hmang

Iran semi-official Mehr news agency chuan an rama nuclear scientist, Mohsen Fakhrizadeh thah nan khan satellite-controlled machine gun hman a ni tih a tarlang. 

Mohsen Fakhrizadeh hi November 27 khan Tehran khaw daiah silai leh car bomb hmanga beih a ni. Thah a nih dan chungchangah hian sawi dan hrang hrang pawh a awm. Report hmasa lam chuan a bodyguard-te inkara inbeihna chhuakah kahhlum niin an sawi a, mahse ṭhenkhat chuan pick-up truck aṭangin remote-controlled machine gun hmangin kahhlum a ni a, a kaptu hian Iran ram a chhuahsan nghal niin an sawi bawk. 

Iran Islamic Revolutio­nary Guard Corps-a deputy commander Commodore Ali Fadavi chuan Fakhrizadeh hi silai mu 13 zeta kahfuh a nih thu sawiin, a bul maia ṭhu a nupui erawh chu hliam pawh a tuar lo a ni, a ti. Beih a nih lai hian scientist hi a bodyguard 11 ten motor dangin an zui tih a sawi bawk. 

Fakhrizadeh thah chung changah hian Iran chuan Israel chu mawhphurtuah a puh nghal a, Iran ram hotu lu ber Ayatollah Khameini leh an ram hruaitu dangte chuan phuba lak ngei an tiam a ni.