Canada-in an rama pem lut thei zat ti tlem dawn

Canada sorkar chuan ram dang aṭanga pem lut thei zat a ti tlem dawn. Ram mipui tam zawk chuan an rama pem lut tam lutuk hi an ngaimawh thu an lo sawi fo tawh a ni.

Canada hi developing country aṭangin dinhmun leh khawsak ṭha zawk beiseiin an pan nasa hle. An ram mipui pawh hi kum 2023 aiin kuminah 3.2% in a pung a, kum 1957 hnua an punna a san ber ṭum niin mi mtd 41 an tling. Ram mipui punna san chhan pakhat hi pem lut an tam vang a ni.

Prime minister Justin Trudeau chuan Covid 19 hri lengin harsatna hrang hrang a thlenah, ram danga pem lut an tam chuan an ram economy siamṭhat lehna kawngah a pui hle niin a sawi. Mahse insiamrem a hun tawh a ni, kum thum chhung chu an rama luh phalsak zat hi an titlem dawn tih a sawi.

Trudeau chuan pem lut tam avanga an ram mipui pung chho chak lutuk chu ven a ngai tih sawiin, "Sorkar chuan level hrang hrangah hma a lak leh phawt a,mipuite tana healthcare, housing leh social service lama investment pawimawh a tihna turin hun a neih a ngai dawn a ni," a ti.

Immigration ministry chuan kum 2025 leh 2026-a an rama inbengbel tura luh phalsak zat tur hi a hma chuan mi 500,000 ve veah a lo bithliah a, mahse hei hi siamṭha lehin, nakkumah chuan mi 395,000 leh kum 2026-ah mi 380,000 chin chauh luh phalsak an ni ang a, kum 2027-ah 365,000 phalsak an ni bawk ang.

Kum 2021-a chhiarpui neih aṭanga a lan danin, Canada mipui zinga 23% chu ram danga piang an ni. Kum 2021 thleng khan pem lut tam ber hi Asia leh Middle East aṭanga kal an ni a, mahse Africa ram aṭanga lut an pung chho tawh hle a ni. Canada-a pem lut zingah 5% chu India rama piang an ni bawk.