Maldive President-in a hlawh 50% chauh la dawn

Sum lama harsatna tawk mek, Maldives chuan inrenchemna a kalpuina turah, president Mohamed Muizzu hlawh chu 50% a ti hniamin, sorkar hnathawk tam zawk hlawh pawh 10% in an ti hniam bawk. Hei hi kum hnih chhung atan hman phawt a ni ang.

President Muizzu chuan a kaihhruai sorkarin an ram economy siamṭhatna tura ruahmanna a siam hi puangin, a hmasa ber atan President chuan a hlawh aṭangin 50% chauh a la rih dawn a ni, a ti. Bank-a thawk tih loh, sorkar hnathawk dangte hlawh pawh 10% in tih hniam a ni dawn bawk. "Economy siamṭha tura ruahmanna siam hnuaia 2025 budget pharh a nih hunah, sorkarin sum hman tihtlemna tur ruahmanna eng emaw zat telh a ni dawn a, hei hi kum hnih atan a ni phawt ang," a ti. 2024 first quarter-a Maldive ram leiba hi USD tld 8.2 a tling tawh a,hei hi an GDP aṭanga 115.7% a tling .

Kum 2025-ah chuan President hian kum khata a hlawh ṭhin, ruflyaa mtd 1.2 aṭangin rufliya 600,000 (USD 39,087) chauh a la tawh ang. Hlawh tih hniam tur hian judge leh Parliament member te huam lo mah se, President chuan an sum dinhmun siamṭhatna turin anmahni duhthu ngeia an hlawh aṭanga 10% an tih hniam a beisei thu a sawi.