Brexit : UK-EU talk chhunzawm leh dawn
United Kingdom leh European Union chuan EU aṭanga Britain a chhuah hnua insumdawn tawn dan chungchanga inremna siam tuma inbiakna an neih tawp san lailawk mah se chhunzawm leh an tum.
Post-Brexit trade deal chungchangah hian inbe tawh mah se inremna an la siam thei lo a, EU lam chuan thutlukna an siam dawn hnai tawhin an sawi a, mahse hei hi UK lamin a la pha thung.
UK chief Brexit negotiator, Lord Frost chuan EU lama aiawh, Michel Barnier chu a be leh dawn a, Britain PM Boris Johnson pawhin European Commission president Ursula von der Leyen chu telephone-in a be ve bawk ang.
UK leh EU hian kuminah inremna hi an siam thei lo a nih chuan UK leh EU inkara bungraw phurte chu ramri-ah enfiah vek an nih bakah, chhiah chawitir an ni tawh dawn a ni. Brexit transition hun hi ni 23 hnuah a tawp tawh dawn a ni.
Trade deal chungchangah inbiakna an neihah hian thil pathumah an la inrem thei lo a, hei vang hian kar liam ta Zirtawpni khan an inbiakna hi a titawp lailawk a ni. Johns leh Leyen-te chuan thuchhuah inṭawm siamin, fishing rights, competition rules leh inremna siam takte kenkawh dan tur chungchangah harsatna a la awm tih an sawi a, heng thil pawimawh pathumah hian inremna hi an siam theih loh chuan trade deal siam chu a theih dawn loh a ni,an ti. Hei vang hian inremna siam ngei a nih theihna atan inbiak leh an remti a ni.
EU chuan UK hi workers' ritghts, environmental regulation leh state aid chung changahte EU rules zawm zel turin a duh a, mahse UK chuan EU chhuahsan duhna chhan ber EU common rules aṭanga inlakchhuah hi a ni tih a sawi ve thung.
Kumin kumtir khan Britain chuan kum li chhung EU hnuaia a awm hnuah a chhuahsan a, transition period hi kumin kumtawpah a tawp dawn a ni. Hei vang hian transition period tawp hma ngeia insumdawnna kawnga inremna siam tumin hma an la a, mahse an la tifel thei lo a ni. British media-te chuan UK cabinet minister-te chuan trade deal hi siam thei lo mah se Prime Minister Johnson chu an thlawp zel dawn tih an sawi niin an tarlang.