US leh China-in 2019 Arms Market thunun
US leh China rama company-te chuan kum 2019-a global arms market an thunun a, a ṭum khatna atan khawvela ralthuam siamtu company lian 25 zingah Middle East aṭangin company a rawn lang ve bawk.
Stockholm International Peace Research Institute-in nimina report a tihchhuahah, nikum chhunga khawvela ralthuam siamtu company lian 25-te hralh chhuah zinga 61% chu US arms industry te hralh a ni a, China company ten 15.7% an hralh bawk tih a tarlang.
Top 25-te ralthuam hralh chhuah hi a kum hmasa aiin 8.5% in a pung a, dollar tluklehdingawn 361 a tling pha. Hei hi UN peacekeeping operation annual budget aiin a let 50 zetin a tam a ni.
Ralthuam siamtu lian 10 zingah US company paruk, China company pathum leh Britain aṭangin pakhat, BAE System telin pasarihna a ni. US company panga - Lockheed Martin, Boeing, Northrop Grumman, Raytheon leh General Dynamics-te chu a sang pangaah an awm a, China company AVIC, CETC leh Norinco-te chu parukna, pariatna leh pakuana niin, US group L3Harris Technologies chu 10-naah a awm ve bawk.
US hian kum tam tak chhung chu arms market hi a thunun tawh a, mahse China hi a rawn lian chho ve zel a, kum 2019 khan an company-te thil siam hralhna hi 5% dawnin a pung chho a ni.