Japan ram inthlanpui neih a ni

Japan ram inthlanpui chu nimin khan neih a ni a, voter-ten an ram hruaitu thar tur thlangin vote an thlak.

October 1-a prime minister atan lak luh thar, rorellai Liberal Democratic Party (LDP) hruaitu Shigeru Isihina chuan PM atana thlan tlin a nih aṭanga ni thum hnu lekah an ram inthlanpui neih tur hi a lo puang tawh a ni.

Rorellai, LDP hi a dinhmun a tlahniam hle a, hemi rual hian party malah erawh a dinhmun a la ṭha ber tura ngaih a ni. Inthlan hmaa mipui ngaihdan lakah, LDP hian duhtu 20% a nei pha tawh lo a, hei vang hian member 465 awmna, Parliament lower house, Diet ah majority a nei pha tawh kher lo maithei. LDP hian lower house-ah hian seat 247 nei mekin, a thawhpui Komeito chuan seat 32 a nei ve bawk. Diet-a majority nei tur hian seat 233 neih phak a ngai.

Eptu party lian ber, Constitutional Democratic Party of Japan (CDP), chu a rawn chet ṭhat chhoh rin a a, mahse prime minister hlui Yoshihiko Noda kaihhruai party hian sorkarna erawh a chelh phak a rinawm loh thung. CDP hian Parliament ṭhiah takah seat 98 a nei a ni.

Nimina inthlanpui neihah hian candidate 1,344 awmin, an zingah hmeichhia 314 an tel. Vote thlakna hi 45,000 siam niin an ram hunah Pathianni zan dar 8 thleng thlak theih a ni a, result hi tih chhuah nghal thuai tum a ni. Japan ramah hian vote chhiar chhung hun an hmang rei ngai lo a, tukin zing lamah chuan inthlan result pawh hi a kimchanga hriat theih beisei a ni.