Philippines-ah thlipui tleh vanga thi mi 126 tling tawh

Philippines rama thlipui, Trami tleh vang leh ruahsur nasa avanga chhiatna thlenga thi leh chin hriat loha awm chu nimin thleng khan mi 126 an tling tawh a, hmun tam takah harsatna tawk chhan chhuah ngai an la awm bawk.

Thlipui Trami hian Zirtawpni liam ta khan Philippines hmar thlang lam a nuai a, ruah a ken tel bawk avangin chhiatna nasa tak a thlen a ni. Thuneitute chuan thi hriat chian tawh hi mi 81 niin, chin hriat lohin mi 34 an awm niin an sawi a, thi zat an punchhoh pawh a rinawm thu an sawi.

Police, kangṭheltu pawl leh emergency service mi leh sate chuan hmanrua chi hrang hrang leh ui fingte hmangin chin hriat loha awmte zawn hna hi an thawk mek a ni.

President Ferdinand Marcos chuan Inrinni khan Manila chhim chhak lama thlipui thlenna hmunte a tlawh a, ruah a sur nasat tuilian an tuar bawk a ni. President chuan tui a tam lutuk a ni tiin, darkar 24 chhung chauhin thla hnih chhunga ruah tui an dawn ang zat atla hman tih a sawi. Chhanchhuah hna chu thawh mek a ni a, hetih lai hian hmun tam tak chu tuilianin a la chim avangin tlawhpawh a la harsa tih a sawi.

Thlipui tlehna kawngah hian mi mtd 4.2 chuang an cheng a, mi 6,400 vel chuan an in leh lo chhuahsanin relief centre-ah an khawsa mek a ni.