Israel-ah inthliarna tihbo a ngai: Israel PM

Israel Prime Minister Benjamin Netanyahu chuan an rama Ethiopian Jew-te'n en hran an ni tia lungawi lohna an lantir hnuah, an rama inthliarna awm ṭhin chu tihbo a ngai tih a sawi.

Pathiannia Ethiopian Jew-te'n lungawi lohna lantira kawng an zawh ṭum khan police-te nen innawrin, buaina a chhuak zui a ni. He thil thlen hnu hian PM Netanyahu chuan Ethiopian Jew hruaitute leh Ethiopian Israel sipaite a kawm nghal a, kar kaltaa Israel police officer pa­hnihin Tel Aviv khawpui daia kut an thlak, Ethiopian Jew, Israel sipai Damas Fekade pawh Thawhṭanni khan a hmu bawk.

Israel President Reuven Rivlin pawhin Ethiopian Jew-te chunga thil thleng chuan Israel society dinhmun a tilang a ni tiin, hei hi enfiah vat a ngai a ni, a ti.

Pathianni zana Tel Aviv-a nawrh huaihawtte leh police-te inkara buaina chhuakah hian police 46 leh nawrh huaihawt zinga pasarihte'n hliam an tuar a, nawrh huaihawt zinga mi eng emaw zat chu man an ni bawk.

Israel police thupuangtu, Micky Rosenfeld chuan sipai kutthlaktu police pahnih zinga pakhat chu suspend a ni a, pakhat chu force aṭanga ban a ni tawh tih a sawi a, kut an thlak dan hi chhui mek a ni.