Nepal-in thil siamṭhat dan tur a ruahman ṭan

Nepal chuan lirnghingin thil tam tak a tihchhiatte din thar a, siamṭhatna tur ruahmanna a siam ṭan ta. April 25-a lir nghing vanga thi hi mi 7,365 an tling tawh a, hliam tuar mi 14,366 an awm bawk.

National Planning Commission (NPC) chuan siamṭhat hna thawh dan tur ruahmanna hi a siam dawn a, hei hi an ram sorkar leh international community hnenah a pe ang. NCP vice chairman, Govinda Pokhrel chuan lirnghingin thil a tih­chhiate enfiah leh, awmze neia hmalak dan tur ruahmanna siam a ni dawn tih a sawi.

NPC hian Pathianni khan meeting a ko a, hetah hian mithiam­te pawh an tel. Meeting-ah hian lirnghing tuartu, tlang rama chengte awmna tur siam dan chungchang an ngaihtuah. Ministry of Urban Development and Construction chuan Home Ministry nena thawkdun a, lirnghingin thil a tihchhiat dan kimchang data lakhawmtu tur special task force a din tawh a ni.

United Nations chuan lirnghing vanga chhiatna thleng hi mi maktaduai 8 velin an tuar niin a sawi. Lirnghing tuartute tan hian an awm lailawkna tur puan in maktaduai 2 bakah ei tur leh damdawi-te mamawh a nih thu a sawi.

UN leh international organization-te chuan lirnghing tuarte chhawmdawlna atan dollar maktaduai 415 mamawh a nih thu an lo sawi tawh a ni.

Magnitude 7.9-a naa lir­nghingin a sâwi vang hian chenna in nuai chuang a chhia a, Kathmandu khawpuia President Office, Nepal Army Headquarters leh Supreme Court building-te pawh hmun ṭhenkhatah a chhe tel a ni.

Nepal Deputy Prime Minister Prakash Man Singh chuan chenna in nuai chuang a chim bakah, luah zui ngam loh sing tel a awm bawk avangin he hmuna chengte lo khawsak lailawkna tur, puan-in maktaduai khat chu rang taka mamawh a nih thu a sawi.