Official chhungte sumdawn phal dawn lo
Shanghai city sorkar chuan dan thar siamin, city official chhungte chu mimal sumdawnna an kalpui a khap. He dan thar hi China ram pumah eirukna umbo tuma a hmalakna peng pakhatah a hman chhoh rin a ni.
China President Xi Jinping-a'n thuneihna a chan aṭangin an rama eirukna tihbo tumin hma a la a, sorkar official eng emaw zat chu eirukna leh thamna sum laknaa an inhnamhnawih avangin man an ni tawh.
March thla khan President Xi hian Shanghai sorkarin official chhungte, mimal sumdawnna kalpui khap a tumna dan siam hi a lo pawmsak tawh a, eiruk dona kawngah Shanghai chu hma hruaitu turin a ngen.
Dan thar siam hian city govenrment hnuaia deputy bureau director leh a chunglamte a huam a, hei bakah hian rorel lai Communist Party, judiciary, local parliament leh state enkawl enterprise hnuaia mite pawh a huam tel ang.
City party chief, Han Zheng chuan official ni chunga sumdawnna kalpui a, hausa taka awm chu an tum tur a ni lo tih a sawi. Shanghai khawpui senior official-te nupui/pasal leh a fate chu mimal emaw, partnership hmang emaw-a an sumdawn phalsak an ni dawn lo a, rampawn lamah pawh sumdawnna lama an investment tih khap a ni bawk. Senior official kawppuite chu private company emaw, foreign invested entreprise-ah emaw dinhmun sang tak an chelh remtih a ni lo bawk. An fate leh an kawppuite chu sumdawn phalsak ni mah se, official hnathawhna bial chhungah erawh phal a ni lo ang.