Turkey leh US-in inremna ziak dawn
Turkey leh US chuan ramdang mite'n Syria leh Iraq-a Islamic State (IS) firfiak pawl an zawm tur an dan theihna atana thawhdunna tur inremna an ziak dawn. Inremna an siamah hian IS zawm tum nia hriatte chanchin kimchang an inhrilh tawn dawn a ni.
Turkey-a US ambassador, John Bass chuan, "Turkey sorkar nen hian firfiak nia kan hriatte, firfiak pawl nena inzawmna nei nia kan hriatte chanchin rang leh chipchiar zawka kan inhrilh tawn theihna atana thawhdun dan tur kan ngaihtuah mek a ni," a ti.
Ram pahnihte hian kumin February thla khan Syria leh Iraq rama IS firfiakte hneh an nih theihna atana Syria helpawlte thuam chakna turin inremna an lo siam tawh a ni.
Syria ramri kaltlanga Islamic State firfiakte an rama lut tur veng turin Turkey hian ramri-ah venhimna a tikhauh tawh a, Europe ram hnenah hian an rama zin tur, firfiak pawl zawm tuma nia an rinhlelhte chanchin chiang zawka hrilh thuai ṭhin turin a lo ngen tawh bawk.