Japan-a rorellai ṭangrual pawlin majority nei pha lo

Japan ram inthlanpui, Pathiannia neih takah rorellai, ṭangrual sorkar-a tel party pahnihte chuan Parliament lower house, Diet-ah majority an nei pha lo.

Prime minister Shigru Ishiba kaihhruai sorkarah Liberal Democratic Party (LDP) leh Komeito party an tel a, seat 465 awmna Diet-ah hian seat 215 chauh an la pha a, majority neih tur seat neih ngai zat 233 chu an pha ta lo a ni. Sorkar hmasaah khan party pahnih hian seat 279 an nei a ni.

LDP hi party mala seat la hnem ber la ni mah se, kum 2009 hnua an ram inthlanpuia a chet chhiat ber ṭum a ni. Ishiba hian LDP chuan ṭangrual sorkar a siam leh dawn tho tih sawiin, eptu party pawh thawhpui tura an inhuam thu a sawi. Democratic Party of the People leh Japan Innovative Party chu thawhpui tel theih an inbeisei.

Eptu party, Yoshihiko Noda kaihhruai Constitutional Democratic Party of Japan chu an rawn che ṭha hle a, inthlan hmasaa seat 98 an lak laiin, tun ṭum inthlanah chuan seat 148 an la thei a ni. Noda chuan rorellai party-ten Parliament-a majority an neih chhunzawm theih lohna tura an beihna chu a hlawhtling ta tih a sawi. Sorkar thlak a ngai tawh a ni tiin, eptu party dangte nena ṭangrual sorkar siam an duh tih a sawi a, mahse sorkar erawh an siam theih a rinawm loh thung.

Tun ṭum inthlanah hian Parliament member nih tuma chuh candidate 1,344 awmin, an zingah hian hmeichhia 314 an tel. Hmeichhe candidate 314 awm zingah hian 73 thlan tlin a ni a, hmeichhia thlan tlin an nih tam ber ṭum a ni.