Israel-in UN aid agency hnathawh khapna dan pass

Israel Parliament chuan Thawhṭanni khan an ram chinah UN relief agency, United Nations Relief and Works Agency for Palestine Refugees (UNRWA) in hna a thawh khapna tur dan siam thar pahnih a pass. He thil hian Gaza Strip-a mipui dinhmun a chhiat belh hlauhthawnna a siam nghal hle.

Kum 2023, October 7-a Palestinian firfiak pawl, Hamas ten Israel an beihnaah hian UNRWA staff eng emaw zat an inrawlh thu Israel chuan a lo sawi fo tawh a ni. Hemi chungchang hi UN pawhin chhui chiangin, an staff member pakua chu ban an lo nih phah tawh a ni. Parliament-in he thutlukna a siam chungchangah a rawlral zawnga Israel beihnaa inhnamhnawih, UNRWA thawktute chu mawhphurtu an ni, tiin Israel prime minister Benjamin Netanyahu chuan a sawi.

Hetih lai hian UNRWA hotu, Philippe Lazzarini chuan Israel Parliament thutlukna siam chu UN charter leh international law kalh a ni, a ti. "hei hi UNRWA tih hmingchhiatna tura hmalakna kal zel leh, Palestinian raltlante chhawmdawl hna thawh mek tih tawp tumna a ni," a ti. UNRWA hian Palestinian raltlante chhamdawl hna a thawk ṭhin a, Gaza Strip bakah West Bank-ah pawh an thawk tel a ni.

UN secretary-general Antonio Guterres pawhin Israel dan thar siam hi demin, UNRWA hi khap an nih chuan Palestinian mite tawrhna a nasa zual dawn hle niin a sawi.

Parliament-in dan a pass thar pakhat hi Israel ram chhunga UNRWA hna thawh khapna a ni a, a pahnihna hi Israel leh agency inlaichinna tih tawpna tur a ni bawk. Dan hmasa zawkah member 92 in thlawpin, a thlawp lo lamah mi 10 an awm. A thlawp lo tute hi Arab parliamentary party member-te an ni. Dan pahnihna hi 87-9 vote hmanga pass a ni bawk.

Israel Parliament member-te chuan UNRWA chu raltlante chhawmdawl hna thawktu ni loin, Hamas tana thawktu an ni, an ti. UNRWA hnathawh khapna tur hi pass mah se, anmahni thlaktu tur lam erawh an sawi lang lo. Israel PM Netanyahu chuan Gaza-a civil mite chhawmdawl hna thawk turin international partner-te thawhpui an inhuam reng thu a sawi a, mahse eng angin nge hna an thawh dawn tih erawh a sawi lo.

Dan thar an pass-te hi Israel foreign ministry-in United Nations a hriattir ang a, a hriattir aṭanga ni 60-90 chhungin hman a ni ang.