China : Nau piang tlem vangin kindergarten tam tak khar

China ram nau piang an tlem zel avangin ram chhung hmun hrang hrangah kindergarten tam tham tak tih tawp a ni tawh.

Ministry of Education in annual report a tih chhuahah, kum 2023-a an rama kindergarten awm zat chu 274,400 niin, a hma kum aia a tlemna hi 14,808 a tling. Kum hnih chhung chu kindergarten awm zat hi a zawnin a tlahniam tawh a ni.

Kindergarten a naupiang ziah luh pawh kum thum an tlahniam tawh a, kum 2023-ah 11.55% a tlahniam in, naupang mtd 40.9 an awm.

Primary school awm zat pawh 2023-ah 3.8% in a tlahniam a, school 143,500 a awm. Kum hmasa lam aia a tlemna hi 5,645 a tling.

China rama hian kum 2023 khan nau piang mtd 9 awmin, kum 1949-a record an ziah aṭanga nau piang an tlem ber kum a ni. Nau piang an tlem zel laiin kum upa lam awm zat erawh an pung chak hle thung. Kum 2023 kumtawpah China rama kum 60 leh a chunglam awm zat chu mtd 300 dawn an tling tawh a, 2035-ah mtd 400 chuangin, kum 2050-ah chuan mtd 500 an tling tawh dawn a ni. China sorkar pawhin pension leh kum upa zawk enkawlna atana a sum sen pawh a pung zel a, pension kum pawh mipa kum 60 aṭangin 63 leh, hmeichhia kum 55 aṭangin 58-ah a ti pung tawh a ni.