Hezbollah hruaitu thar Naim Qassem

Lebanon helpawl, Hezbollah chuan an pawl hruaitu thar atan Naim Qassem thlan a ni tih nimin, October 29, 2024 khan an puang.

Nair Qassem hi Hassan Nasrallah hnuaiah kum sawmthum chuang chu deputy leader a lo ni tawh a ni. Kumin September 27-a Israel sipaiten Nasrallah an kahhlum avangin Hezbollah hruaitu hna hi a chelh dawn ta a ni. Nasrallah thih hnuah an pawl aiawha thu sawiin TV-ah vawi thum a inlan tawh.

Thuchhuah an siamah, Hezbollah chuan Qassem hian Hezbollah thuthlung leh thil tumte chu a vawn ngheh tlat thu sawiin, hemi avang hian an pawl hotu atan a thlan a nih thu an sawi. An pawl kaihhruai hna leh, Islamic beitute do letna kawnga a hma laknaah pawh pathian kaihhruaina an dilpui thu an tarlang . An hotu thi ta, Nasrallah policy-te chu hnehna an chan hma chu an kalpui zel dawn tih an sawi bawk.

Kum 71 mi, Qassem hi Hezbollah 'number two' tia sawi a ni ṭhin a, 1980s tir lama Hezbollah dintu, sakhaw lam mi thiam zingah pawh a tel.

Israel sipaiten Nasrallah an kah hlum hnuah, a thlaktu tur atan Hashem Safieddine chu sawi rik a ni. Mahse October 23 khan Israel Defence Force (IDF) chuan Safieddine pawh kar thum kal taah an lo kap hlum tawh tih an sawi leh a ni.