NKorea-in Russia pui turin sipai a tir : NATO

North Atlantic Treaty Organization (NATO) chuan Ukraine donaa Russia pui turin North Korea chuan Russia-ah a sipaite a tir ngei tih a sawi. NKorea sipai zinga ṭhenkhat chu Russia leh Ukraine inbeih mekna, Kursk bialah tirh an ni tawh a ni, a ti.

NATO secretary-general Mark Rutte chuan he thu hi Thawhṭannia NATO headquarters, Brussels-a chanchin thar lakhawmte a kawmnaah a sawi a ni. Indonaa NKorea rawn inrawlh chu indona thleng mek ti punluntu tur a ni, tiin a sawi. South Korea president leh Ukraine defence minister te pawh a be buai thuai dawn tih sawiin, thil awmdan chu uluk taka an thlithlai reng tur thu a sawi.

North Korea in Russia-ah training turin sipaite a tir thu hi a hmain sawi a lo ni tawh a, mahse Ukraine indonaah an inhnamhnawih ve dawn em tih erawh sawi tel a ni lo. Mahse NATO chuan Ukraine beihnaah NKorea sipaite an tel ve thu hi a rawn sawichiang ta a ni. US chuan Russia-a training tura NKorea sipai tirh hi mi 3,000 vel niin a tarlang.

Ukraine president Volodymyr Zelenskyy pawhin intelligence report an dawn aṭangin, North Korea sipaite chu indona hmunah tirh an ni ve thuai dawn niin a lo sawi tawh bawk.