Sorkar siam tura Israel PM hnena hun pek a tawp

Israel Prime Minister, Benjamin Netanyahu-a hnena ṭangrual sorkar siam tura hun tiam chu nizan khan a tawp.

March thlaa inthlanpui neihah khan Netanyahu-a party, Likud party chuan seat a la hnem ber a, mahse party mala sorkarna a siam phak loh avangin thawhpui tur an dap mek a ni. Nizan zanlai thleng khan hun pek a ni a, hemi chhunga sorkar siam thei tur member a ngah tawk loh chuan President Reuven Rivlin-a'n sorkar siam tur hian midang a sawm ang.

Netanyahu hian Thawh­lehni zan thleng khan party pathum- centrist Kulanu leh ultra-Orthodox party pahnih-te chu inremna a siampui tawh a, heng party pathumte nen hian Parliament, Knesset-a seat awm 120 aṭangin thlawptu 53 a nei tawh.

Nimin khan right-wing Bayit Yehudi (Jewish Home) party, Naftali Bennett kaihhruai nen an inbia a, an inrem theih chuan Bayit Yehudi party seat 8 nen majority a neih pha dawn a ni. Mahse Bennett hian ṭangrual sorkara an zawm dawn chuan justice ministry portfolio pek a phut nia sawi a ni.

Israel foreign minister, Lieberman chuan ṭangrual sorkar siam tuma inbiakna kal dan hi ram hmangaihna a tel lo nia sawiin, inbiakna aṭang hian a inhnukdawk tawh a ni.