IS hruaitu palite lumanah dollar mtd 20
US sorkar chuan Islamic State (IS) hruaitu palite man an nih theihna atan an chanchin hrilh theih hnenah lawmman, dollar maktaduai 20 a phal thu a puang.
IS hruaitu pali-te hi Abd al-Rahman Mustafa al-Qaduli; Abu Mohammed al-Adnani; Tarkhan Tayumurazovich Batirashvili leh Tariq Bin-al-Tahar Bin al Falih al-'Awni al-Harz te an ni a, Rewards of Justice Program hnuaiah man tuma zawn zingah dah an ni.
US State Department chuan IS senior official, Qaduli chanchin hrilh theih hnenah lawmman, dollar maktaduai 7 pek a tiam a, Adani leh Batirashvili-te chanchin hrilh theih hnenah dollar maktaduai 5 leh Harzi chanchin hrilh theih hnenah dollar maktaduai 3 a tiam.
State Department chuan Adani hi IS official thupuangtu a nih thu sawiin, Batirashvili hi Syria hmarlama IS commander a ni a, Harzi hi IS suicide bomber hotu a ni tih a tarlang bawk.
IS hian Syria khawchhak lam leh Iraq hmarlamah ram eng emaw zat a la tawh a, a ram lak chin hi Islam ram, caliphate-ah puangin Islam dan khauh tak a lekkawh nghal.