Texas cartoon contest beitu niin IS-te inchhal

Islamic State (IS) firfiak pawl chuan Pathianni tlaia US, Texas state-a Prophet Muhammad-a cartoon contest neihna hmun beitu an ni tih an sawi. Texas police-te chuan silai nena contest neihna hmun beitu mi pahnihte chu an kaphlum nghal a ni.

IS hian an radio channel, al-Bayan-ah Texas beitute an nih thu hi an puang a, an pawl sipai pahnihte chuan Dallas khawdai, Garland-a contest neihna hmun, Culwell Event Center hi an bei tih a sawi. Thuchhuah an siamah, IS chuan, "America hnenah hian eng thil nge thleng dawn tih kan hrilhna a ni a, IS sipaite chuan thil pawi tak an la thlen zel dawn tih an hre dawn a ni," a ti.

Hetihlai hian thuneitute chuan contest neihna hmun beitute hi IS firfiak pawl nen hian inzawmna an neih hriat a nih loh thu an sawi a, IS leh firfiak pawl dangte an tel lohna hmuna pawikhawihna thleng pawh an pawl tih niin an chhal fo ṭhin tih an sawi.

Culwell Event Center beitute hi Elton Simpson leh Nadir Soofi-te an ni a, assault rifle hmangin center pawn lam hi an bei a, a chhunga an luh hmain entrance-a duty, security te chuan an kaphlum a ni. Security guard pakhat chu pawikhawihtute hian an kaphliam a, midang hliam tuar an awm lo.

Pawikhawihna thlen lai hian Center chhungah hian mi 200 vel an awm a, an zinga tam tak chuan pawn lama thil thleng hi hriat pawh an hre lo.