Nepal lirnghinga thi zat 7,652 an tling

Nepal ram lirnghing vanga thi zat chu nimin thleng khan mi 7,652 an tling tawh a, hliam tuar mi 16,390 an awm bawk.

Lirnghing vang sorkar building chhe zat chu 10,718 a ni a, civil mite chenna in 191,058 chu a chhiat vek bakah, 175,162 chu luah chhunzawm ngam lohin a tichhe bawk.

Ram leh pawl hrang hrang aṭangin lirnghing tuarte chhawmdawlna tur thawnluh belh zel a la ni a, mahse chhawmdawlna thawnluhte hi a tuartute hnena semchhuah hna tihkhawtlai a nih kawngah international agency leh Nepal sorkar an inpuhtawn.

Chhawmdawlna thawnluhte hi engte nge a ni tih hriat lawk theih a nih loh avangin Nepal sorkar chuan airport-ah custom of­ficial-te chu check phawt turin a ti a, mahse a enfiah hna hi a thawh chak theih loh avangin bungrua tam tak chu airport-ah hian a inchhekkhawl a ni.

Home ministry official, Laxmi Prasad Dhakal chuan ṭanpuina thawntu tam tak chuan an mamawhte zawt hmasa loin an thawn tawp a, ṭhenkhat chu document mumal pawh awm loa thawnte a awm a ni, a ti.