Taliban-in hmeichhiate a ria ṭawngtai khap

Afghanistan-a rorellai, Taliban sorkar chuan hmeichhiate khuahkhirhna tur thupek thar a siam leh a, an chhungkaw member ni lo midangte hriat turin a ria an ṭawngṭai a khap.

Ministry for Promoting Virtue and Preventing Vice chuan he thupek thar hi August 31-a a siam kha a ni a, minister Mohammad Khalid Hanafi chuan hman turin a ti chhuak a ni. Hmeichhiate chu an taksa leh hmai te khuh vek tura tih an nih bakah, an ṭawngṭai pawhin midang awm laia ring taka ṭawngṭai khap an ni. Minister chuan hmeichhia aw chu 'awrah' a ni tiin, a awmzia chu an aw ri chu thup tur; pawn lam mi, hmeichhe dang pawhin an hriat tur a ni lo, tihna a ni.

Taliban-te dan thar siam hi ram dangte chuan an sawisel nasa hle a, he dan hmang hian hmeichhiate zalen taka an ṭawng chhuah ve theihna rahbeh sak a ni dawn niin an sawi.

Kum 2021-a Taliban-ten Afghanistan-a thuneihna an chan aṭangin hmeichhiate khuahkhirhna dan khauh tak tak an siam chho reng a ni. August thla khan pawn chhuahnaah hmeichhiate chuan an hmai chauh ni lo, an taksa pumin an khuh vek tur tiin thupek a lo ti chhuak tawh a ni.

Afghan hmeichhia tam zawk chu pawn lama hnathawka an chhuah pawh khap an lo ni tawh. Hetih lai hian hnathawh phalsak tlem an awm a, hengte hi healthcare worker an ni tlangpui. Anni pawh pawn lamah an ṭawng phal an ni lo a, a chhungte mipa pawh pawn chhuahnaah hian an biak phalsak an ni lo a, an natna chungchang pawh an chhungte mipa hrilh pawh phalsak an ni lo bawk.