NKorea sipaite chet dan thlithlai turin SKorea-in Ukraine-ah team a tir dawn

South Korea chuan Russia-Ukraine indona thleng mekah Russia pui tura North Korea sipaite tirh an nih dan leh, an chet dan thlithlai turin Ukraine ramah team tirh a tum.

North Korea-in Russia-ah training turin a sipaite a tirh thu hi a hmain US leh SKorea hian an lo sawi tawh a, sipai a tirh zat hi 11,000 vel niin an sawi thar leh. North Korea sipai zinga 3,000 chuang chu Ukraine do turin indona thlenna hmun hnaivaiah tirh an ni tawh ani, tiin SKorea official chuan a sawi.

Pentagon thupuangtu, Sabrina Singh pawhin NKorea sipai ṭhenkhat chu Ukraine ramri hnaihah an awm tawh a ni tiin, heng sipaite hi Russia-in Kursk Oblas bial a beihna tura Russia sipaite pui tura dah an ni, a ti.

US president Joe Biden chuan Ukraine chu an ramah North Korea sipaite hi an lut a nih chuan na taka lo bei let turin a ti a ni. Ukraine hian Russia sipaite pui turin an ramria NKorea sipaite an awm tawh nia sawi a nih hnuah, sipai lak belh a tum. National security council secretary, Lytvynenko chuan Parliament-ah sipai 160,000 lak belh tum a nih thu hi sawiin, thla thum chhunga lak fel tum a ni.

Hetih lai hian Russia chuan Ukraine nena an indonaah NKorea a tel ve nia sawi chu thu dik lo a ni tih a sawi. Mahse an ramah North Korea sipaite training tura tirh an nih thu erawh a pha lo a, hei chu ram pahnihte inlaichinna thil vang zawk a ni tiin a sawi. Russia foreign affairs minister Sergey Lavrov pawhin nikum June thla khan Russia leh NKorea hian joint security agreement an lo ziak tawh tih a sawi ve bawk.