UK, EU leh Canada-in Myanmar sipai hrekna thar siam

United Kingdom, European Union leh Canada chuan Maynmar sipai sorkar hrekna tur an siam belh leh. October 29, 2024-a hrekna thar an siam hian Myanmar sipai tana aviation fuel leh hmanraw dang supply-tu company te a huam a ni.

Thuchhuah an siamah, UK chuan August thla kha Myanmar sipaiten airstrike an neih tam ber ṭum a ni tih sawiin, civil mi tam takin nunna an chan niin a tarlang. He thil hi mihring dikna chanvo palzutna lian tak a ni, a ti.

Kum 2021, February thla khan sipai chakna hmanga Myanmar-a Aung San Suu Kyi kaihhruai civil sorkar paihthlain, thuneihna an chelh zui a ni. Sipai sorkar duh lotute leh sipaite inkarah buaina nasa tak chhuakin, tun thlengin tualchhung buaina hi a la thlen chhunzawm reng a ni.

Sipaiten thuneihna an chan hnu hian khawthlang ramte chuan hrekna eng emaw zat an siam tawh. UK, EU leh Canada chuan company laka hrekna thar an siam hi Myanmar sipaiten civil mite beihna tur airstrike an neih ṭhin danna tur a ni tiin, company paruk lakah hrekna hi an siam. An zingah hian nikuma UK-in a lo hrek tawh, Myanmar sumdawng lian Zaw Min Tun company,Asia Sun Group Company Limited pawh a tel. Hei bakah hian Progress Technology Support Company (Royal Shune Lei Co) leh King Royal Technologies Company Limited pawh an tel bawk.

UK chuan Myanmar sipaite hnena ralthuam hralh leh sum hmanga ṭanpui ṭhinte hrek chhunzawm zel a tum tih Foreign, Commonwealth and Development Office (FCDO) chuan a sawi. UK hian Myanmar Sanctions Regime hnuaiah mi mal 25 leh pawl/company 33 a lo hrek tawh a ni.

Myanmar tualchhung buaina thleng vang hian mi maktaduai 3.4 chuangin an in leh lo an tlanchhiatsan tawh a, mi maktaduai 18 chuang chu chhawmdawl ngaiin an awm mek bawk.