Thailand PM-in emergency hlip

Thailand prime minister Pryut Chan-o-cha chuan nimin khan an rama state of emergency puan a hlip 

Zirlaite huaihawta Prime Minister ban phut leh, an ram lal thuneihna tihnepsak a nih theihna atan danpui siamṭhat phuta hun rei tak nawrh huaihawt a, tharum thawhna te a thlen hnuah PM Prayut hian October 14 khan buaina punlun zel venna atan ram pumah state of emergency hi a puang a ni. 

Emergency dan hnuaiah hian mi pali aia tam pun­khawm khap a ni a, police-te chu thuneihna sang zawk pek niin, an ram security tiderthawng thei thil nia sawi te chu online lamah pawh tihchhuah khap a ni. Mahse emergency puan a nih hnuah pawh nawrh huaihawtte hi kawtthlerah pungkhawmin lungawi lohna an lantir chhunzawm reng tho a ni.

PM chuan Nilainia an ram mipuite hmaa thu a sawiah, emergency puan hnuah pawh nitin kawtthlerah nawrh huaihawt chhunzawm reng a ni tih a sawi a, an thil phut chungchang hi Parliament-a sawiho a nih theihna atana hun pe tura ngenin, sorkar leh nawrh huaihawtte pawh an inbengdaih ve ve a ngai a ni, a ti. 

Cabinet chuan eptute thil phut ngaih­tuah tur hian kar lehah Parliament emer­gency session neih a lo remti tawh a ni. Hetih lai hian Parliament-ah PM party hian majority a neih avangin, eptu lam thil nawr hi a tlang a rinawm lo hle thung. 

Nawrh huaihawtte hian kum 2014-a sipai chakna hmanga sorkar a paihthlak hnua thuneihna chang zui tu, PM Pryut hi kum 2019-a inthlanpuia a chak danah thil dik tawk lo a awm niin an puh a, hei vang hian bang turin an phut a ni. Mahse Pryut chuan inthlana a chak dan chu a dik tawk tih a sawi thung a, Prime Minister a nihna aṭanga ban a tum loh thu a sawi. 

Sorkar sawiselna lam hawi tichhuak ṭhin, online broadcaster Voice TV chu court-in Thawhlehni khan a tihtawp sak. 

Digital ministry thupuangtu Putcha­pong Nodthaisong chuan Voice TV hian thu dik tawk lo a tihchhuah ṭhin avangin Computer Crime Act a palzut a ni, a ti. Hetih lai hian Voice TV editor-in-chief Rittikorn Mahakhachabhorn chuan an journalist-te behchhan zela tarlang an nih thu sawiin, an kaldan phung chu thlak an tum lo tih a sawi. 

Nawrh huaihawt chungchang an tihchhuah ṭhin avangin thuneitute chuan media organistation pali an chhui chiang mek a, an zingah Voice TV pawh hi a tel a ni. He channel neitu zingah hian PM hlui Thaksin Shinawatra leh a farnu Yingluck chhungkua-te pawh an tel.