Spain rama tuilian vanga thi mi 158 tling

Spain ram khawchhak lam, Valencia province-a tuilian vanga thi chu nimin thleng khan mi 158 an tling tawh. Chhanchhuah hna tawktute chuan chin hriat loha awmte zawn hna ngawrh takin an thawk chhunzawm zel.

Ningani khan police-te chuan Valencia khaw daiah ruang pariat an hmuh belh tih mayor Maria Jose Catala chuan a sawi. Thawhlenia tuilian nasa tak thleng tuarte, chin hriat loa la awmte chu nungdama hmuh beiseina a tlem tawh hle niin thuneitute chuan an sawi bawk. Chin hriat loha awm zat chiah hi official-te chuan an tarlang lo a, mahse mi tam tak niin an sawi.

Spain lal, King Felipe VI chuan an ram chhim leh khawchhak lamah ruah a sur leh dawn nia sawi a nih vangin 'emergency' chu a la zo lo tih a sawi a, prime minister Sanchez pawhin mipuite chu fimkhur turin a chah bawk.

Ruahsur nasa avanga tuilian hian Valencia leh Spain ram hmun dang inkalpawhna, kawngpui leh rel kawng tam tak a tichhia. Valencia province-a khaw eng emaw zat chu khawchhungah tui a la tling nasain, nunphung a la tibuai hle. Thlai chinna hmun tam tak pawh tuiin a chim chhe tawh a ni.

Chhiatna thleng vanga thite sunna chu Ningani aṭang khan neih niin, ni thum chhung sun a ni ang. Hemi chhung hian an ram puanzarte chu sorkar building hrang hrangah a ngul chanve-ah zar a ni dawn a ni.

Spain-in chhiatna a tawh hi kum 50 chhunga thlipui leh tuilian kaihhnawiha chhiatna thlenna nasa ber a ni. Tuilian tuarte chhanchhuah leh chhawmdawl hna thawk turin sipai 1,000 chuang tirh an nih thu defence minister Margarita Robles chuan a sawi. Hmun ṭhenkhat helicopter hmang chauha tlawhpawh theihte an awm.