Bangladesh-a Jatiya Party headquarters hal

Bangladesh khawpui, Dhaka-ah Ningani zan khan an ram prime minister hlui, Sheik Hasina thlawptu political organisation, Jatiya Party headquarters halsak an ni.

Bijoy Nagar area-a Jatiya Party headquarters haltute hian party member-te nen a hma in an intibuai a, office chhungah lutin bungruate an suasam hnuah an hal zui a ni.

Jatiya Party hi Bangladesh party lian pathumna niin, military dictator hlui HM Ershad-a'n 1980 chhoa a din a ni. Bangladesh prime minister aṭanga paihthlak tak, Hasina an thlawp avangin sawisel an tawk fo a ni. Kumin July thlaa zirlai pawlin Hasina leh a kaihhruai sorkar laka lungawi lohna lantira nawrh an huaihawt, Anti-Discrimination Student Movement-a an khaipa, Hasnat Abdullah chuan Jatiya party chu ram phatsantu tiin a sawi a ni. Party office beih chungchangah eng pawl mahin an tih a nih thu an la sawi lo a, hetih lai hian Abdullah chuan a hmain zirlaite chu Dhaka University-a kal khawm a, lungawi lohna lantira Jatiya Party headquarters pana kawng zawh turin a lo ti tawh a ni.

Party secretary general Mujibul Haque Chunnu chuan an party office beitute chu zirlaite nia sawiin, an thiltih hi mipui pawhin an hmu vek a, ṭhenkhat chuan social media lamah pawh an live a ni, a ti.