Pakistan-in Balakot firfiak camp din thar leh

Pakistan-a Balakot-a firfiak camp, kum 2019 February thlaa India sipaiten surgical strike an neih ṭuma an kahchhiat sak nia an sawi chu din thar leh niin, Pakistan firfiak pawl Jaish-e-Mohammad (JeM) commander Juber chuan an pawl mi leh sa lak tharte training pek nan a hmang mek nia sawi a ni. 

Juber hi Afghanistan-a NATO sipaite beihnaah pawh a inhnamhnawih nia sawi a ni. 

Balakot camp-ah hian control room siam thar pawh hmuh a ni a, he room hi JeM leh  pawl dang, India rama firfiak lutru turte pui ṭhintute chuan an hmang a ni. India leh Pakistan inrina, Line of Control (LoC) pela India rama an luh hnuah, he room aṭang hian anmahni buaipuitute chuan firfiakte chu code word hmangin an tih tur an hrilh.

Pakistan ramah hian firfiak 40,000 vel an awm mek nia sawi a ni a, United Nations-in international terrorist-a a puan pawh mi 16 an awm a ni. Heng firfiakte hi Jamaat-ud-Dawa leh Jaish-e-Mohammad member-te an ni a, heng pawl pahnihte hi khawvel pumah dan pawnah hnawl an ni. 

Nikum February 14 khan Pakistan firfiak chuan car bomb hmangin Jammu and Kashmir-a Pulwama hmuna Central Reserve Police Force (CRPF) convoy a bei a, sipai 40 an thi a, midang eng emaw zatin hliam an tuar. He pawikhawihna rapthlak tak hi Pakistan firfiak pawl, JeM chuan an tih niin an sawi. He thil thleng vang hian February 26, 2019 zing dar 3:30-ah Indian Air Force chuan fighter jet hmangin Pakistan ram chhunga Balakot-a JeM firfiak pawl camp chu a bei let ve nghal a, an camp pawh hi an kapchhia tih an sawi.