Nigeria sipaiten nawrh huaihawtte kap

Nigeria-a Lagos khawpuia nawrh huaihawtte security force-ten silaia an kah hnuah Nilaini khan khawpui chhung buil­ding eng emaw zat chu hal a ni bawk. 

Police-te rawng taka an chet ṭhin dan duh lohna lantirin ṭum eng emaw zat nawrh huaihawt a ni, hei vang hian curfew pawh puan a ni. Mahse Thawhlehni zan khan mi 1,000 chuang chu curfew puan hnuah nawrh huaihawtin an pungkhawm a, heng mite hi security force-te chuan light an tih thim vek hnuah silaiin an kap a, thi leh  hliam awm zat chiah erawh hriat chian a ni lo.  

Security force-te silai hmehpuah hi ram hrang hrangten an dem thu an sawi nghal a, UN High Commissioner for Human Rights Michelle Bachelet chuan sipaiten an thuneihna dik lo taka an hmang nia an ngaih thu leh, inkahna a thlen hmaa CCTV camera leh light-te tihtawp vek nia sawi chu thu dik a nih chuan sipaite hian a hmaa ṭanga pawikhawihna thlen tur hi an lo duang lawk a ni tih a chiang dawn hle a ni, a ti. 

Amnesty chuan sipaite silai hmeh­puahah hian nawrh huaihawt zingah thi an awm ngei tih an hriat thu leh, thi zat tak erawh chu an la hriatchian theih loh thu a sawi. 

Hetih lai hian Nigerian army chuan Thawhlehni zana thil thleng chung­changa sawifiah tura ngenna chu an la chhang lo a, mahse an Twitter lamah chuan thu dik lo niin a tarlang thung. 

Mipuite hian hun eng emaw chen chu Nigeria police unit, Special Anti-Robbery Squad (SARS) chet dan duh loin nawrh an huaihawt tawh a ni. Human rights group-te chuan SARS hi mi sum chhuh luih sak, mi nghaisak leh tualthahna thlengin an inhnamhnawih nasa hle niin an puh. Mipuiten lungawi lohna an lantri avang hian October 11 khan he unit hi ṭhiah a ni a, mahse hemi hnuah mipuite chuan enforcement law siamṭhat phutin nawrh an huaihawt chhunzawm zel a ni.