Brazil-in China Covid-19 vaccine siam lei a tum lo

Brazil president Jair Bolsonaro chuan Nilaini khan an ram chuan China siam Covid-19 vaccine, Sinovac chu lei an tum loh thu a sawi. 

Thawhlehni khan Brazil health minister Eduardo Pazuello hoin an rama state governor-te chuan meeting an nei a, he meeting thuchhuakah hian Sinovac vaccine chu lei an tum thu leh an rama  immunization program-a a tel thu tarlan a ni. Hei bakah hian Oxford University siam AstraZeneca's vaccine siam chu lei an rel bawk. 

Mahse hemi hnuah Presi­dent Bolsonaro chuan China vaccine chu lei a nih dawn loh thu a sawi ve leh a, an ram health ministry official Elcio Franco chuan vaccine zawng zawng chu federal health pawmpui a ngaih thu leh China vaccine siam erawh sorkarin lei a tum loh thu a sawi ve bawk a ni.  

Hei bakah hian Brazil hian UK vaccine lei a lo tum tawh bawk a ni. 

Brazil president-in China vaccine lei sak a tum loh chhan hi Brazil mipuiten an duh loh vang nia sawi a ni. China hi Covid-19  hri rawn chhuahna a ni a, hei vang hian China vaccine siam lei tum hi mipuite chuan an sawisel a ni.