US-in Taiwan hnenah ralthuam hralh tum
US State Department chuan Taiwan hnenah weapon system chi thum hralh a remti a, heng zingah hian sensor, missile leh artillery-te pawh telin, ralthuam an hralh tur hlut zawng hi US dollar vaibelchhe 1.8 a ni tiin Pentagon chuan Nilaini khan a tarlang.
Heng ralthuam chi thum hralhna tur package siam hi US State Department chuan a pawm hnuah Congress-ah final review nei turin a thawn nghal a, Congress hian ni 30 chhung ralthuam hralh tur chungchang hi ngaihtuahna hun a nei a ni. Congress hian a pawmpui ngei rin a ni bawk.
Taiwan hnena hralh tum ralthuam zingah hian Boeing Co siam, US dollar vbc 1 man hu SLAM-extended-range missile ṭhahnem tak a tel a, Lockheed Martin Corp. siam US dollar maktaduai 436 man hu mobile artillery rocket system leh Raytheon Technologies Corp siam US dollar mtd 367 man hu surveillance and reconnaissance sensor-te pawh a tel,
Thla hnih liam ta khan US chuan Taiwan hnenah Lockheed Martin Corp. siam model thar F-16 Block 70 aircraft 66 chu hralh turin a lo tifel tawh bawk a ni.
Nimin khan US-in Taiwan hnena ralthuam hralh a tum chungchangah hian Taiwan presidential office chuan thuchhuah siamin, US chungah lawmthu a sawi. US aṭanga ralthuam an lei tur hmang hian Taiwan chuan a ram a venhimna lamah a hmalakna chu a thuam chakin a tichangtlung thei dawn a, remna leh ralmuanna a awm theihna tur a nih thu Taiwan presidential office thupuangtu Chang Tun-han chuan a sawi.
Taiwan leh China inkar a ṭha lo
China hian Taiwan ram hi a rama bial pakhatah tun hma aṭangin a lo chhiar tel tawh ṭhin a ni. Tun hnai hian Taiwan leh a chheh velah China chuan a sipai People’s Liberation Army (PLA) a dah belh a, hei vang hian US chuan Taiwan hi a pui mek nia sawi a ni bawk.
A ṭhenawmte ram chunga China inlulingna tihziaawm a nih theih nan US chuan Taiwan chu a pui niin media ṭhenkhat chuan an tarlang. Taiwan leh a chhehvel bakah China hi South China Sea-ah a inluling chho mek niin media-te chuan an sawi bawk. Nikuma extradition bill leh kumina national security law thar chungchanga China-in Hong Kong-a a hmalakna chu Taiwan chuan ṭha a tih loh thu a lo sawi fo tawh a ni.
US-in Taiwan hnena ralthuam a hralh tum chung changah hian China chuan na takin a sawisel nghal a, China ramri chhungah US chu a inrawlh nia a puh bakah China inpumkhatna leh China security tiderthawng zawngin US chuan hma a la a ni tiin China Foreign Ministry thupuangtu Geng Shuang chuan a sawi.