Israel-ah Netanyahu-a'n tangrual sorkar a siam leh dawn
Israel Prime Minister Benjamin Netanyahu chuan hun tiam chhungin ṭangrual sorkar thar siam turin a mamawh zat member a nei thei ta.
March thlaa inthlanpui an neihah Netanyahu-a party, Likud Party hian seat la hnem ber mah se, member 120 awmna parliament, Knesset-ah sorkar siam turin member a ngah tawk lo a, party dang nena an thawhho a ngai a ni.
President chuan seat la hnem ber, Likud party hruaitu Netanyahu hi sorkar siam tura sawmin, Nilaini zan zanlai thleng khan hun pek a ni. Hun tiam a ral hma hian Jewish Home party chuan inremna siampui lehin, sorkar siam tura member mamawh zat a nei thei ta a ni. Hemi hma hian center Kulanu party, ultra-Orthodox Shas leh United Torah Judaism party-te chu ṭangrual sorkar siampui turin inremna a lo ziahpui tawh bawk. Netanyahu kaihhruai ṭangrual sorkar thar hian member 61 a nei thei dawn ta a, thawhhona tihlen zel tumin a bei dawn tih a sawi.
Netanyahu hi kum 1996 khan a vawi khatna atan Israel Prime Minister-ah lakluh a ni a, tun ṭum hi PM term li a chelhna tur a ni ang.
Nilainia inremna a siampui, Jewish Home party, Bayid Yehudi hruaitu Naftali Bennett chuan justice ministry pek a phut. Bayit Yehudi hi Palestinian state din dodaltu a ni a, Israel-in Palestinian ram a luah, West Bank-a Juda-te chenna tur in sak chu a thlawp bakah, in pawh sak belh zel a duh a ni.
Israel rama Parliament inthlan buatsaih tawh chinah, party mala sorkarna siam thei an la awm lo a, ṭangrual sorkar zel a la ding.