European Commission-in J&J company contract ziahpui

European Union (EU) member ramten Covid-19 vaccine an chan ve theih nan, European Commission (EC) chuan pharmaceutical company Johnson & Johnson (J&J) chu contract a ziakpui.

Covid-19 vaccine peih fel a nih hunah Europe-a mi maktaduai 400 chuangten vaccine an hman ve theih nan EC chuan J&J hi contract a ziahpui tih EC thupuangtu Stefan de Keersmaecker chuan a sawi. EU chuan hemi chungchangah hian company dangte pawh a ṭul chuan a la thawhpui zel dawn tih Keersmaecker chuan a sawi bawk. 

Europe-ah hian Covid-19 hri leng thawh hnihna a thleng mek a, hei vang hian mipui himna leh nakin zela EU member ramte an him nan vaccine chungchangah hian J&J chu inremna an ziahpui tih European Commissioner for Health and Food Safety, Stella Kyriakides chuan a sawi.

J&J hian phase 3-ah clinical trial a nei mek a, he vaccine an siam mek hi nakkum kum tir lamah chuan a him tawka a rintlak a nih chuan emergency atan peihfel hman an tum a ni. 

World Health Organi­zation (WHO) tarlan dan chuan kumin October 19 thleng khan Covid-19 vaccine siam tuma beih mek 44 a awm tawh a, chungte chu clinical trial neih pui mek niin, China, United Kingdom, Russia, United States, Belgium leh Germany-ah chuan phase 3-ah trial neih mek a ni tawh.