Pakistan-a helicopter tlaah Norway leh Philipines palai an thi
Pakistan hmarlam, Gilgit-ah nimin khan sipai helicopter chesualin school-ah a tla a, mi paruk thiin an zingah hian Norway leh Philippines ambassador an tel. Helicopter tlakna school hi a kang zui a ni.
MI-17 helicopter-ah hian ramdang mi 11 leh Pakistan mi paruk an chuang a, Norway ambassador Leif H Larsen leh Philippines ambassador Domingo D Luncenario Jr-te bakah, Malaysia leh Indonesia ambassador-te nupuite pawh an thi tel a ni. Midang 13 hliam tuar zingah hian Poland leh Netherlands ambassador-te an tel bawk. Hliam tuarte hi Gilgit-a sipai damdawi-inah lak nghal an ni.
He vanduaina thlen lai hian Pakistan Prime Minister Nawaz Sharif-a pawh Gilgit-Balistan territory hmarlamah project pahnih hawng turin a kal a, ramdang palaite pawh hi helicopter pathum hmangin he hun hmang tura kal an ni. Gilgit-Balistan territory hi Kashmir ram inchuh bial chhunga awm a ni.