US-in Syria helte training a pe ṭan ta
US sipaite chuan Islamic State (IS) firfiakte hneh an nih theihna turin Syria helpawlte chu training a pe ṭan ta. Pentagon chuan kum thum chhungin Syria helpawl mi 15,000 vel chu training pek a, thuam chak a tum a ni.
US defence secretary Ashton Carter chuan a hmasa ber atan mi 90-te training pek an nih thu a sawi a, mahse an pekna hmun hi an tlangzarh lo. Training pekna senso zawng zawng hi US chuan a tum vek dawn a ni. Carter chuan Syria bakah Jordan, Turkey, Qatar leh Saudi Arabia-ahte training pek chhunzawm an tum thu a sawi.
Training-naa tel turin fighter 4,000 chuang an in volunteer tawh a, mahse Carter chuan training an pek turte hi uluk taka an thlan tur thu a sawi.