Saudi Arabia-in Yemen-a inkahhai puan a rawt

Saudi Arabia kaih­hruai­a Arab ṭangrual ram­te’ n Yemen-a helpawl, Hou­thi laka beihpui an thlak hnuah mi 1,400 vel an thi tawh a, Yemen sipai leh Houthi helpawlte an la inbei chhunzawm reng bawk.

Saudi Arabia chuan indona avanga mipuite’n harsatna an tawh avangin ni nga chhung inkahhai puan a rawt dawn tih a sawi.

US Secretary of State John Kerry pawhin Saudi Arabia leh Yemen helpawlte hi inkahhai puan chungchang hi an sawiho mek tih a sawi bawk.

Saudi Arabia hian Houthi helte chu an ral­thuam dah thla a, mipuite harstana sutkianna tura inkahhai puang turin a rawt a, a rawtna hi helpawl lam hian an la chhang lo.

Helhoin an beihna avang hian Yemen President Abdrabbuh Mansour Hadi chu February thla khan an ram khawpui, Sanna aṭang­in a tlanchhia a, chhim lama lawngchawlh hmun pawimawh awmna, Aden khuaah a biru a ni. Heta ṭang hian Saudi Arabia ramah a tlanchhe leh a ni.

Houthi helte hian Sanaa khawpui an lak hnuah, Aden khua lak leh tumin an bei a, security force-te nen nasa takin an inbei a ni. UN Office for the Co-ordination of Humanitarian Assistance thupuangtu, Jens Laerke chuan Aden-a inbeihna a thlen hnu hian mi 6,000 velin hliam an tuar tawh a, an zinga tam tak chu civil mi an ni, a ti. Laerke chuan, “Aden khaw mipuite chu kar ruk chhung zet dinhmun harsa takin an awm tawh a, heng mite tan hian hmun him lam pana an chhuah theihna tur te, damdawi lama an inenkawl theihna tur hunte siamsak an ngai tawh a ni,” a ti.

Saudi Foreign Minister Adel al Jubeir chuan Yemen tualchhung indona tuartu, mipuite ṭanpuina atan dollar maktduai 274 pek a nih tur thu a sawi bawk.

Saudi Arabia hian a hma pawhin Houthi laka beihpui a thlak hi a chawl lailawk a, mahse hemi chhung hian helpawl hian remchanga hmangin, sipaite beia an hmun pawimawhte an laksak bakah, Aden khua lak tuma an beihnaa nasa takin hma an sawn hman a, hei vang hian Saudi hian thlawhtheihna hmangin a bei chhunzawm leh ta a ni.