Britain inthlanah Conservative-in hma hruai

Britain Parliament in­thlan neih zawh takah rorellai, Conservative chuan hma a hruai a, mahse majority erawh a nei pha dawn lo niin a lang.

Result kimchang hi hriat la ni lo mah se, Conservative hian parliament lower house, House of Commons-a seat 650 awm­ah seat 203 a la tawh a, seat 316 a lak phak rin a ni. Labor Party chuan seat 239 a lak theih rin a ni a, pathumnaah Scottish National Party (SNP) awmin an ni hian seat 58 an lak theih rin a ni bawk a, UK Independence Party (UKIP) chuan seat 2 a la tawh bawk.

Parliament-a majority nei tur hian seat 326 tal neih phak a ngai a, seat la hnem ber Conservative Party hian hei hi a neih tlin rin a ni lo a, party dang nena an thawhdun an ngai dawn a ni.

Conservative Party an chak leh tak avangin Prime Minister David Cameron chu Britain PM a ni chhunzawm leh thei dawn a ni.

Scotland-ah chuan parliament seat 59 awm aṭangin SNP chuan seat 55 a la thei a, SNP member, university zirlai kum 20 mi Mhairi Black-i chu Paisley and Renfrewshire South bialah thlan tlin a ni a, Labour Party senior member a hneh a, kum 1668 hnua Britain parliament member ni thei naupang ber a ni. Black-i hi Glagsow university zirlai a ni a, graduate turin final exam hmachhawn a la ngai a ni.