Ukraine President-in NKorea sipaite chet hmaa hma la turin ngen

Ukraine president Volodomyr Zelenskyy chuan an thawhpui ramte hnenah Russia sipaite pui tura North Korea sipaiten indona hmun an thlen hma ngeia hma la turin a ngen.

North Korea hian Russia-ah training tura a sipai eng emaw zat a tirh hnuah, NKorea sipai ṭhenkhat hi Russia-Ukraine indo meknaah Russia sipaite pui turin tirh an ni dawn tih sawi a lo ni tawh a ni. US chuan NKorea sipai 8,000 vel chuan kar liam ta kartawp lamah khan Russia-a Kursk bial, Ukraine ramri bul chu an thleng tawh a, Ukraine sipaite bei turin an inpuahchah mek niin a sawi a ni.

Ukraine military intelligence pawhin NKorea sipai 7,000 chuang chu Russia ralthuam nena thuamin Ukraine ramri bulah an awm mek tih a sawi. Heng sipaite hi Russia khawchhak lama hmun pangaah training pek an ni, a ti.

President Zelenskyy chuan indona tualzawlah NKorea sipaite an luh hma ngeia hma la tur leh, lo thlir ringawt lo turin khawthlang ramte a ngen. Ukraine sipai hotu pawhin an sipaite chuan beihna hautak ber zingah mi an hmachhawn dawn tih a sawi ve bawk.

Hetih lai hian North Korea foreign minister, Choe Son Hui chuan Russia-in Ukraine laka hnehna a chan hma chuan Russia chu an theih angin an thlawp zel dawn tih a sawi. He thu hi kar liamta Zirtawpnia Russia foreign minister, Sergei Larvor nena Moscow-a an inkawmnaah a sawi a ni. Putin-a rorelna fing tak hnuaiah, Russia chuan an ram tana dikna leh himna tura a beihnaah hnehna ropui tak a chang ngei dawn niin NKorea Minister chuan a sawi.

Russia-in Ukraine khaw 2 a lak belh

Russia defence minister chuan an sipaiten Ukraine khawchhak lama khaw pahnih chu an la tih Inrinni khan a puang.

Russia sipaite hian hun eng emaw chen chu Ukraine khawchhak lam, Donetsk bialah na zawka hma la in, hma an sawn zel a, khaw eng emaw zat an la tawh a ni.

Defence Ministry chuan sipaiten khua an lak belhte hi industrial town, Kurakhove bul hnaia awm, Kurskhiva a ni. Kurakhove khua hi Russia hian lak tuma a bitum mek a ni. Hei bakah hian Kharkiv biala thingtlang khua, Pershotravneve chu an la tel bawk.

Kumin October thla chhung khan Russia sipaite hian Ukraine ram km 478 bial chu an lak sak a ni.