Yemen helte'n ni nga inkahhai puan rawtna an pawm

Yemen sorkar paihthlak tuma hel, Houthi-te chuan Saudi Arabia-in tualchhung indona thleng vanga mipuite harsatna sutkian dan kawng zawnga ni nga inkahhai rawtna a siam chu an pawm tih an sawi.

Yemen sipai zinga Houthi thawhpuitu aiawhin Colonel Sharaf Luqman chuan inkahhai puan hi an remtih thu leh, Thawhlehni aṭanga hman ṭan tura an tih thu a sawi.

Saudi Arabia kaihhruai, Arab ram ṭangrualte chuan Yemen sorkar puiin helho lakah hun eng emaw chen beihpui an thlak tawh a ni. UN chuan thlawhtheihna hmanga mihring chenna huam chhunga bomb thlak chu international law kalh a ni a ti a, beihpui thlak a nih aṭangin mi 1,400 vel an thi tawh a, an zinga a zahve aia tam chu civil mi an ni, a ti.

Nimin khan Yemen khawpui, Sanaa-ah President hlui, Ali Abdullah Saleh in chu bomb a ni bawk a, mahse President hlui hi a na lo nia sawi a ni. Saleh hi Houthi helpawlte thlawpah puh a ni. Saleh hian kum sawmthum dawn Yemen President hna a chelh hnuah, kum 2012 khan amah duhloa rampum huapa nawrh huaihawt a nih hnuin a bang a ni.

Saudia kaihhruai ṭangrual pawl hian Houthi hel vanga Saudi Arabia rama himna zawnga tlanchhe mek, Yemen President Abdrabbuh Mansour Hadi-a kaihhruai sorkar chu dahkir leh an tum a ni. Houthi hel hian nikum khan an ram khawpui, Sanaa-ah thuneihna an la tawh a, an thuneihna huang hi zauh tumin an bei mek a ni. Helpawl hian Hadi-a kaihhruai sorkar chu eiruk leh hlemhletnaa a inhnamhnawih nasa nia puhin, sorkar thlak an tum tih an sawi.