Iraq tan-in aṭangin 50 chuang tlanchhuak
Iraq khawpui, Baghdad hmarchhak lam, Khalis-a jail chu beih a nih hnuin, jail tâng 50 chuang an tlanchhuak. Jail beihnaah hian tâng 30 leh guard 10 in an thi bawk.
Islamic State (IS) firfiak pawl chuan Inrinnia jail beitute hi an ni tih an sawi a, mahse official-te chuan mi tâng inkara buaina chhuak vang niin an sawi thung.
Police official-te chuan tâng ho an intibuai a, intibuaite ṭhelh tuma kal, guard-te chu beih niin an ralthuamte an chhuhsak zui a ni. Hemi hnu hian tâng zinga mi 50 chuang chu an tlanchhuak a, an zingah hian IS member-a puh bakah, firfiak zawnga chetna avanga man mi pakua an tel. Midangte chu criminal pangngai an ni.
Mahse IS hian an pawl website-ah thuchhuah siamin, tan-in aṭanga an mi leh sate chhanchhuah an nih theihna atan hian tan-in bul vela army leh police convoy-te beihna atan improvised explosive device (IED) bomb 15 an tipuak niin an sawi. Motor eng emaw zat hmangin tan-in chhunga tlanlut a, an member-te lakchhuah an tum nia sawi a ni bawk.
Khalis hi Diyala province-a awm a ni a, Baghdad aṭanga kilometre 80 vela hlaah a awm. Tan-in a buaina a chhuah hnu hian khawpuiah curfew puan nghal a ni.