Mubarak leh a fate kum thum tang turin hrem

Egypt President hlui, Hosni Mubarak leh a fapate pahnih chu sorkar sum tam tham tak tichingpena puh an nihna thubuaiah thiam loh chantir an ni a, kum thum tang tura hrem an ni.

Kar kalta Inrinni khan Mubarak leh a fapate thubuai hi ngaihtuah nawn leh niin, thiam loh chantir an ni. Sum an tih chingpente hi presidential palace cheiṭhatna leh enkawlna tur sum a ni a, mahse Mubarak-ate pafa hian an mimal in cheina atana an hmang nia puh an ni.

Thubuai ngaihtuah a nih lai hian court pawn lamah Mubarak-a thlawptu mi eng emaw zat an pungkhawm a, Judge Hassan Hassanin-a thutlukna siam chu an pawm loh thu an sawi.

Mubarak-a ukil chuan judge thutlukna chu appeal theih a nih thu a sawi.

Kum thum tang tura hrem an nih bakah, Mubarak-ate pafa hi dollar maktaduai 16.3 chawi tur leh, an sum tihchingpen dollar maktaduai 2.7 rul leh tura tih an ni bawk. Mahse judicial leh security official-te chuan Mubarak-te chhungkua hian an thubuai ngaihtuah hmasak a nih ṭumin presidential palace cheina tur sum hi an rul vek tawh tih an sawi.

Thubuai ngaihtuah zawh a nih hnu hian Mubarak-a enkawl a nih mekna, Cairo-a sipai damdawi-inah hruai let a ni a, a fapate pahnih chu Tora Prison-ah dah an ni.