Yemen President hluiin Houthi hel a thlawp thu puang

Yemen President hlui, Ali Abdullah Saleh chuan an ram sorkar paihthlak tuma hel, Houthi helte chu a thlawp thu a puangchhuak.

Kum sawmthum zet Yemen hruaitu hna a chelh hnuin, kum 2012 khan rampumah Saleh-a duh lohna lantirin nawrh huaihawt a ni a, hemi hnu hian President a nihna aṭangin a bang ta a ni. Houthi helhoin kum February thlaa an ram President Abd-Rabbu Mansour Hadi paihthlak tuma bei a, an ram khawpui Sanaa an thununna hnuai­ah an dah pawh khan helpawlte lamah a ṭang nia sawi ni mah se, a ṭanna lam hi a sawi­chhuak ngai lo. Yemen President Hadi hi Saudi Arabia-ah himna zawngin a tlanchhe mek a ni.

Yemen President Hadi-a'n pui tura a ngen angin Saudi Arabia kaihhruain Arab ṭangrual ramte chuan Houthi helho lakah hian beihpui an thlak a, Pathianni khan Sanaa President hlui Saleh-a chenna in hi an bomb a ni. An bomb lai hian Saleh hi inah a awm lo a, a guard pathum an thih bakah building pathum a chhe tel bawk.

Saleh chuan a chenna in beih anih hnu hian Houthi helte chu ṭangrual pawlte bei let tura theih­tawp chhuah zel turin a fuih. Arab ṭangrual ramte chetdan chu a dem thu sawiin Saleh chuan, "An chet dan hi mi dawihzep thiltih dan a ni. In ngam tak zet a nih chuan indona tualah min rawn hmachhawn rawh u. Rocket leh jet fighter hmang hian in tum in tihlawhtling thei chuang lo ang," a ti.

Saudi foreign minister, Adel al-Jubeir chuan indona avanga Yemen mipuite'n harsatna an tawh mekte chhawk zangkhai a, chhawm­dawlna te pek an nih theihna atan ni nga chhung inkahhai puan a rawt a, mahse Houthi lamin sipaite'n an beihna an tihtawp phawt a phut thung. Houthi lam chuan a thuphungin he rawtna hi an pawm thu an sawi tawh a, an inrem theih chuan vawiin aṭang hian hman ṭan a ni ang.