David Cameron thlan tlin vangin London-ah lungawi lohna lantir

Britain Parliament inthlan neih zawh takah Prime Minister David Cameron-a kaihhruai Conservative party chu kum nga dang sorkar siam thei turin thlan tlin a ni a, Cameron pawh prime minister a ni chhunzawm leh dawn a ni.

Prime Minister atana David Cameron thlan nawn a nih duh lohna lantirin Pathianni khan central London-ah mi ṭhenkhatin nawrh an huai­hawt a, Downing Street-a PM chenna in bulah pungkhawmin police-te nen an innawrbuai. Police-te chuan nawrh huaihawt zinga 17 chu an man a, an innawrbuainaah police officer pali leh staff pakhatin hliam an tuar bawk.

Cameron-a kaihhruai sorkar hian an ram leibate tihziahawm a nih theihna atan budget tihhniam a, thil dang pawh tihhniam chhunzawm zel an tum thu a lo sawi tawh a, hei hi eptu lam tam takin an dodal a ni. Mahse kar kalta Ningania parliament inthlanah khan Conservative party hi party mala sorkar siam thei khawpin a chak a, seat 650 awmnaah seat 331 a la.

PM hian sorkar thar­a a cabinet turte a ruat fel mek a, Chancellor George Osborne, Home Secretary Theresa May, Foreign Secretary Philip Hammond leh Defence Secretary Michael Fallon te chu an post ngai an chelh chhunzawm dawn a, Justice Secretary thar atan Micheal Gove, chief whip-ah Mark Harper leh education secretary atan Nicky Morgan-te a ruat tawh bawk. Pension secretary atan Iain Duncan Smith dah a ni a, House of Lords leader Lady Stowell of Beeston pawh full cabinet post pek a nih tur thu Downing Street chuan a puang. Cabinet tharah hian hmeichhe pathum- Priti Patel, Anna Soubry leh Amber Rudd-te dah an ni dawn bawk.