Nepal-ah ruang zawn hna chawl lailawk

April thlaa lirnghing na takin Nepal ram a sâwi avanga leimin leh vur tawlhin a chhilh ruang zawn hna chu khua a chhiat avangin chawlh lailawk a ni.

Official-te chuan April 25-a magnitude 7.9-a naa lirnghing vanga thi hi mi 8,000 an tling tawh tih an sawi a, hliam tuar mi 17,800 vel an awm bawk. Chin hriat lohin mi tam tak an la awm a, heng mite zawn hna hi thawh chhunzawm reng a la ni.

Pathianni khan lirnghing hian Nepal hi a sâwi nawn leh a, mahse thil tihchhiat thar a nei lo. Hetihlai hian lirnghing na takin a sâwi avang hian vur a la tawlh chhunzawm reng bawk. Langtang valley-a vur tawlhin a chhilhte zawn hna thawktute chuan kar kalta Zirtawpni khan ruang 20 an hmuh belh leh a, mahse vur hi a tawlh chhunzawm reng avangin hnathawktute pawh hi hmun him lamah an insaseng nghal a ni. Langtang valley-ah hian sipaite chuan vur chhilhte ruang 90 an la chhuak tawh a, an zingah hian ramdang mi pakua an tel.

Langtang valley-a vur tawlhin a chhilhte ruang zawn hna hi khua a ṭhat hunah thawh chhunzawm leh a ni dawn tih official-te chuan an sawi.