WHO-in Ebola hri laka fihlimah Liberia a puang

World Health Organization (WHO) chuan Liberia ramah ni 42 chhung Ebola hri vei thar an awm tawh lo tih sawiin, Liberia chu Ebola laka fihlim ramah a puang.

Ebola hri leng vangin Liberia ramah mi 4,700 chuang an thi hman a, he hrileng vanga thi an tamna ber ram a ni. A ṭhenawm, Guinea leh Sierra Leone ramah chuan Ebola hri khuahkhirh tumin theihtawp chhuah mek a ni bawk.

Nikum aṭang khan Ebola hri vang hian mi 11,000 chuang an thi tawh a ni. WHO thuchhuah chuan Liberia rama Ebola vanga thi chhinchhiah hnuhnung ber chu March 27 kha a ni tih sawiin, Liberia ramah he hri leng hi khuahkhirh a ni ta tih a tarlang.

President Ellen Johnson Sirleaf chuan an ram mipui­te leh a mawhphurtute ṭan lakna avangin hri leng chu an umbo thei ta tih a sawi a, Liberia ram chu ram hlimawm takah an siam leh thei ta a ni, a ti.