Nepal-ah magnitude 7.3-a nain lir a nghing leh

Nimin chhun dar 12:35 khan Nepal ramah magnitude 7.3-a nain lir a nghing leh a, lirnghing hi India ram hmarlam leh China ramri bialh pawh an hria a ni. Lirnghin ṭanna, epicenter hi Nepal khawpui Kathmandu khawchhak lam kilometre 83-a hla, China ramri bul a ni a, leihnuai km 18.5 km vela thuk aṭanga inṭan niin US Geological Survey chuan a tarlang. Epicenter hi Everest Base camp bulhnai a ni.

April 25-ah magnitude 7.8-a naa lir a nghin avangin Nepal ramah hian chhiatna rapthlak tak a thleng a, hriat theih chinah lirnghing vanga thi hi mi 8,000 an tling tawh. Hemi hnu hian vawi tam tak lirnghing hian a la sâwi nawn (aftershock) a ni.

Nimina lirnghing hian eng ang chhiatna nge a thlen leh tih hriatchian a la ni lo a, Kathmandu khawpuiah chuan inchhungah awm ngam loin mi tam tak chu kawtthlerah an tlanchhuak. Police-te chuan mipuite chu khawlai hmun rem laia awm tur leh, kawngpuite hnawh buai lo turin an ngen.

Magnitude 7.3 a nghin hnu hian ṭum eng emaw zat lirnghing hian a sawinawn leh a, heng zingah hian magnitude 6.3 a na pawh a tel a ni. Lirnghingin thil a tihchhiatte hi hriatchian theih a la ni lo a, hriat theih chinah nimina lirnghing vang hian mi 26 an thi a, midang 150 velin hliam an tuar. Thi te hi Kathmandu khawchhak lam km 35-a hla, Chautara khuaa mite an ni. Lirnghing vang hian in pali a chim a, eng emaw zat chu a khi bawk. Hei bakah hian hmun ṭhenkhatah leimin a siam bawk a ni.

April 25-a lirnghing rapthlak tak an tawrh avang khan Nepal mi tam tak chu chenna in neiloin kawtthlerah an la khawsa mek a, he lirnghing vanga in chim leh vur tawlhin a chhilhte ruang pawh zawn hna thawk mek a la ni. Mahse khua chhia avangin vur tawlhin ruang a chhilhte zawn hna hi chawlh lailawk a ni.

Nimina lir a nghing nawn leh hian venthawn thilah Kathmandu airport chu khar nghal a ni a, airport-a awmte chu hruaichhuah an ni. Mahse hun eng emaw chen hnuah hawng lehin, dan pangngaiin hna thawh chhunzawm a ni.Nepal Foreign Minister Mahendra Pandey chuan telephone line a chhia a, mahse hei hi siamṭhat tuma theihtawp chhuah nghal a nih thu a sawi.