Burundi President-in EU leh US rawtna a hnawl

Burundi President Pierre Nkurunziza chuan EU leh US-in an ram President thlan hun sawnhla tura an ngenna chu a hnawlsak a, ruahman lawk angin June thlaah inthlan hi ṭha taka an neih theih a beisei thu a sawi.

June thlaa Burundi Presi­dent thlanna neih turah Nku­runziza hian a term thumna atan chuh leh a tum a, hei hi eptu lam chuan duh loin tualchhung buaina nasa tak a chhuah phah a ni. Buaina chhuak vang hian mi 18 an thi tawh a, mi 50,000 chuang chu ram pawn lamah himna zawngin an tlanchhe tawh bawk.

Buaina a chhuah zawm zel avangin US leh EU chuan inthlanna thianghlim leh felfai buatsaih theih a ni lo ang tiin, Burundi ram hnenah hian inthlan hun hi sawnhla turin an ngen a ni. African Union (AU) commission chief, Nkosazana Dlamini-Zuma pawhin Burundi ramchhung dinhmun chu inthlan buatsaihna chi nia a ngaih loh thu a sawi tawh bawk. Mahse President chuan an ngenna hi hnawlin, boruak ṭha tak hnuaiah inthlan hi an buatsaih theih a beisei thu a sawi a, inthlan hun sawn chuan Burundi ram buaina a belhchhah zawk dawn a ni, a ti.

Tualchhung buaina chhuak vang hian Belgium chuan Burundi ram chhawmdawlna a pek, dollar maktaduai 6 dawn chu a titawp rih a ni.

Nkurunziza chuan Presi­dent chuh a tumna dodala nawrh huaihawt chu ram pawn lam aṭanga inrawlh an awm vang niin a sawi a, thi chhung­te a tawrhpui thu a sawi.

Eptu pawl leh civil society group-te chuan Nkurunziza-a'n President term thum chuh a tum chu ram danpui kalh a ni tiin, bang turin an phut. Mahse President chuan a president term khatna chu mipuite thlan ni loin, parliament-in a ruat a nih thu leh, hei hi chhiar tel theih a nih lo thu a sawi thung.