White House-ah Donald Trump a kir dawn; "Kan ram kan ti dam leh dawn"

US President thar thlanna, an ram huna November 5, 2024 a neihah Republican party candidate, president hlui Donald Trump chu thlan tlin a ni a, nakkum January 20-ah US President 47-na atan lak luh a ni ang a, kum li hnuah White House-ah a kir leh dawn ta.

Kum 78 mi, Donald Trump hian Democratic party candidate, Kamala Harris laka hnehna a chang chu America mipuite tana hnehna ropui a ni tiin, kumin July 13-a rally a neihnaa thah tuma beih a nih chungchang chu sawi chhuakin, "Pathianin chhan neiin ka nunna min lo humsak a ni. Kan ram chhanhim tur leh, America ropuina chawinung leh turin min lo hum a, chu chu kan zain kan ti hlawhtling ngei ang," a ti.

Kumin US President thlanna neihah hian Democratic leh Republican party te hi an campaign ngawrh hle a, candidate pahnihte pawh an inbei na a, ṭawngkam mawi lo tak tak hman pawh an nei nual a ni.

Trump chuan Republican party campaign chu an ram chanchina political movement ropui ber a ni tiin, an ram ti dam turin an bei dawn tih a sawi. "Kan ram kan ti dam leh dawn a, ramri te kan tifel dawn a ni. America mipuite hnenah lawmthu ka sawi a, in tan leh in chhungte tan ka theihna zawng zawngin ka thawk dawn a ni," tiin America tana hun rangkachak a ni dawn tih a sawi. Trump hian a nupui Melania Trump leh a fate bakah a thawhpui, vice president candidate JD Vance chungah lawmthu a sawi bawk. Amah thlawptu langsar, Tesla CEO leh X boss Elon Musk hming pawh a lamri bawk.

US President-a tling tur hian electoral college vote 270 hmuh tlin a ngai a ni. Trump hian electoral college vote hi 279 hmuin, Harris hian 223 a hmu.

Hetih lai hian mipuite pawhin vote an thlak tho a, hei hi popular vote an ti. Candidate zingah popular vote hmu hnem zawk hi an chak kher chuang lo. 2016 inthlanah pawh khan Democrats candiate Hillary Clinton chuan popular vote a hmu hnem zawk a, mahse Republican candidate Donald Trump chu President-ah thlan tlin a ni thung. President thlannaah hian hun eng emaw chen chu Democrats lamin popular vote hi an hmu tam tawh zawk. Kumin inthlanah erawh Donald Trump hian popular vote a hmu tam zawk a, kum 20 chhunga Republican candidate zingah Democrats lam aia popular vote-a hmu sang zawk hmasa ber niin, Harris aiin popular vote hi mtd 5 chuangin a hmu hnem a ni.

American voter tam zawk chuan an rama thil man sang zel leh, unemployment rate sang zelah, an harsatna chingfel tur hian Harris aiin Trump an ring zawk tih an sawi. A hmaa Democrats voter nghet ni reng ṭhin, Hispanic bakah thil man sangin a nghawng nat zual, lower-income te chuan Trump hi an thlawp zawk bawk. Trump-a President-na hnuaiah US trade leh climate change policy, Ukraine war, American tax leh immigration chungchangahte inthlak danglamna nasa tak a thlen chhoh ngei rin a ni. Trump hian a campaign-naah pawh an rama dan loa pem lutte thawn haw chu a auhla pui ber zingah a tel.

Nakkum January thlaa US President thar atana lak luh anih hian, President tur lak luh zinga upa ber a ni ang. Hei bakah term zawn loa US President ni thei pahnihna a ni dawn bawk a, a hma hian kum zabi 19-naah khan Grover Clevelend chuan a zawn loin US President term hnih a lo chelh tawh a ni.