Israel PM-in Defence Minister a ban
Israel prime minister Benjamin Netanyahu chuan Thawhlehni, November 5, 2024 khan a defence minister, Yoav Gallant a ban. He thil hian Israel mipuite pawh a ṭhawng hle a, hmun tam takah lungawi lohna lantir a ni zui bawk.
Palestinian firfiak pawl, Hamas leh Lebanon helpawl, Hezbollah te nena indona hautak tak an hmachhawn mek lai leh, an hmelmate an beih letna kawnga mi pawimawh leh langsar, Defence Minister ban a ni hi an ram mipui tam takin an ngaithiam lo hle. Nimin khan Tel Aviv bakah khawpui dangahte mipui lungawi lo an pungkhawma, kawngpuite an dang a ni. Pungkhawmte chuan PM Netanyahu chu ram himna aia a mimal duhdan dah pawimawh zawkah an puh.
Yoav Gallant hian Hamas nen an indo meknaah Hamas mi mante chhuah an nih theihna tura inkahhai lailawk puan duhtu niin, an ram security pawh ennawn a ṭul thu a sawi fo a ni. Hei bakah Israel-a compulsory military service-a ultra-Orthodox mi leh sate ngaihhnathiam an ni chu a sawisel fo. Hun harsa tak an tawh mek laia hetianga ultra-Orthodox te duhsak bik an ni hi mi tam takin an lo sawisel tawh bawk a ni. Gallant hian tun hnaiah ultra-Orthodox mi leh sa, mi 7,000 te sipaia lakna tur draft order a ti chhuak a, hei hian PM Netanyahu kaihhruai ṭangrual sorkara sakhaw party-te a ti thinur hle a, Gallant dinhmun pawh a derthawn phah a ni. An thawhpui party dangte nawrna avangin PM pawhin Gallant hi a ban ta niin a lang.
Eptu hruaitu, Yair Lapid chuan indona an hmachhawn mek laia Gallant ban a ni chu thutlukna atthlak tak a ni tiin, PM Netanyahu chuan Israel himna leh, Israel sipaite chu politics lama a dinhmun siamṭhatna turin a hralh ta a ni, a ti.
Gallant pawhin ban a nih hnua TV-a thu a sawiah, Israel himna tura theihtawp a chhuah zel tur thu sawiin, Hamas mi hren mekte hruai haw thuai an ṭul thu a sawi. "Nung dama an la awm lai ngeia hruai haw an nih theihna turin chak taka kan chet a ngai a ni," a ti.
Israel President Isaac Herzog chuan an ram dinhmun tawn mek thlirin Gallant ban a ni chu thil tih loh tawp tur a ni tiin PM thutlukna hi a sawisel ve bawk.