Trump-a'n a thutiam hlen ngei a tiam

US President atana thlan thar, Donald Trump chuan thlan tlin a nih hnua thu a sawina hmasa berah, thuneihna a chan hunah a rorelna chu motto awlsam tak, "Promises made, promised kept' tih chu a innghahna tur a ni tih a sawi. "Kan thutiamte chu kan hlen dawn a ni," a ti.

Republican party hian Senate an thunun leh tak avangin, Donald Trump hi a president term hnihnaah hian a hmain a political agenda kalpuina kawngah pawh thlawptu a ngah thei tawh zawk dawn a ni. House of Representative thunun tur zawk erawh a la chiang lo a, mahse Republican party hian Democratic party lakah hma a la hruai nia sawi a ni bawk.

Campaign laia Trump auhla pui ber zinga document nei lo, dan loa US-a pem lutte thawn kir a tel. Hei bakah a President hmasak laia dan loa lutte venna tura Mexico nena an inrinnaa daidanna bang a siam ṭan tawh chu a term hnihnaah hian zawhfel ngei a tiam bawk.

US president Joe Biden leh vice president Kamala Harris-te kaihhruai sorkar hnuaiah, kum liamta chhung khan US chhim lama ramri kaltlanga an rama lut ru an tam ber ṭum a thleng a ni.

Trump hian tax lak dan tur thar siam pawh lo tiamin, ramdang aṭanga bungrua lak luhah 10% tal lak a rawt. Hei hi kaltlangpui chuan China chu a tuartu ber niin, tax an chawi hi 60% vel a tling thei ang. Ṭhenkhat chuan hei hi ṭha an ti lo a, thil man a san phah ang a, mipuiin an tuar zawk dawn niin an sawi. Trump hian social security-a tax lak ṭhin pawh tih tawp a tiam bawk.

President a nih lai khan Trump hian environmental protection lama hmalakna eng emaw zat sutin, Paris climate agreement aṭangin US a inhnukdawk bawk. Tun ṭuma a campaign-naah pawh American car industry puihna turin climate regulation siamṭhat a tiam. Electric vehicle te pawh a sawisel fo a ni.

Russia-Ukraine indona thleng meka US-in Ukraine puihna tura dollar maktaduai tel a seng chu Trump hian a sawisel fo. President atana thlan tlin a nih chuan an buaina hi inbiakna hmanga chinfel pui a tiam. Trump hian ramdang buaina US inrawlh reng hi tih nep a duh thu a sawi. Gaza Strip-a indona thleng mekah pawh Israel thlawptu nghet tak a ni tih a insawi chungin, Israel hi Palestinian laka beihpui a thlakna ti tawp turin a nawr fo a ni. Lebanon-a buaina thleng pawh ti reh tura hma lak a tiam bawk.

Donald Trump hian thuneihna a chan aṭanga second reilo teah a laka criminal investigation pahnih siamtu, special councel Jack Smith a ban tur thu a lo sawi tawh bawk. Jack Smith hian Trump hi kum 2020 inthlan result tih danglam tuma puhin, classified document a enkawl danah pawh thil dik lo awm tiin thubuai a siamsak a ni. Trump erawh chuan tih sual engmah a nei lo tih sawiin, Smith hian politics thil vanga hetianga bei hi niin a puh thung. Trump hi a business record-ah thil dik tawk lo a tarlang nia sawiin New York court chuan thiam loh a lo chantir tawh a, thiam loh chang ni chunga US President ni thei hmasa ber a ni dawn.