Germany Chancellor-in a Finance Minister a ban

Germany Chancellor Olaf Scholz chuan a minister hel, finance minister Christian Lindner chu Nilaini, November 6, 2024 khan a ban. Hei vang hian party pathum, Social Democrats, Free Democrats leh Greens-ten ṭangrual sorkar an siam chu a dinhmun a derthawng dawn ta a ni.

Scholz kaihhruai, Social Democrats party leh Lindner kaihruai Free Democrats party inkar boruak hi tun hnaiah a ṭha lo chho hle a, a bikin economic leh financial policy lamah an ngaihdan a inang lo nia sawi a ni. Scholz hian Nilainia party pathum hruaituten meeting an neihah finance minister hi a ban zui ta niin a thupuangtu Steffen Hebestreit chuan a sawi.

Olaf Scholz chuan a finance minister hian a rinna a tichhe tawh nia sawiin, ram ṭhatna tur lam aiin a party ṭhatna tur dah pawimawh zawkah a puh. Hetih lai hian Lindner hian Scholz hi awmze nei lo lutuka Germany kaihruaiah a puh ve thung. Lindner party member pahnih chu cabinet minister an nihna aṭangin an ban ve nghal bawk a, transport minister Volker Wissing erawh chu minister-ah la awm chhunzawmin, party aṭangin a bang dawn tih a sawi ve thung.

Free Democrats-in ṭangrual sorkar an thlawpna an tih tawp dawn tak avangin Scholz hian Social Democrats leh Greens te sorkar siam, minority government a kaihruai dawn ta a ni. Majority an neih phak loh avangin dan pass tur chuan party dangte thlawpna an mamawh ang. Scholz hian finance minister thar atan Jorg Kukies a rawt nghal bawk.